CCXXIX.

1352, Juni 25. Frankenstein.

Rüdiger von Haugwitz, königlicher Hauptmann zu Frankenstein, bestätigt, dass der Ritter Johannes von Seidlitz seiner Mutter Margaretha seine Güter in Baumgarten zu Leibgedinge verreicht.

In nomine domini amen. Nos Rudgerus de Hugwicz iunior maiestate invictissimi domini Karoli regis Romanorum et Boemie capitaneus Frankinsteynensis ad universorum presencia intuencium per­venire cupimus nocionem, quod in nostri testiumque subscriptorum constitutus presencia strennuus miles dominus Johannes de Sydlicz ob conplanacionem (!) et concordiam cuiusdam discensionis materie inter ipsum et matrem suam exorte, concorditer et amice matura deliberacione, consilio et consensu suorum amicorum prehabitis indeceptus, inconpulsus, mera et libera voluntate, bona mentis et corporis sospitate, honeste et spectabili domine Margarete genitrici sue dilecte universa et singula bona sua, que in Boumgarten villa districtus Frankinsteynensis habere dignoscitur, scilicet viginti tres mansos, exaccionem pecunialem et annonalem, defectum monete, pecuniam monetalem cum iudicio manus et capitis cum omnibus et singulis obvencionibus et iuribus aliis ducalibus totam et omnimodam libertatem cum omni iure, dextraliali servicio ibidem, sed excepto tytulo iusti et veri dotalicii, dedit, tradidit et donavit cum omni iure, tali proprietate et dominio, quibus per antedictum dominum Johannem hactenus sunt habita et possessa, pacifice et quiete possidendo, coramque nobis benivole et amanter sibi resignando; supplicantes nobis studiose, quatenus dictam donacionem, resignacionem atque dotalicii creacionem confirmare et dicta bona pretacte domine conferre dignaremur. Nos vero ad ipsorum votiva precamina et ad pie supplicacionis instanciam diligenter inclinati, dictam donacionem atque dotalicii creacionem et resignacionem ratas et gratas habentes auctoritate regia, qua presencialiter dicto in districtu fungimur, presentis carte patrocinio confirmando nomine dotalicii approbamus; presentibus strennuis ac famosis viris, dominis Conrado de Rybnicz, Johanne de Bebirsteyn, Steffano de Rychinbach, Heynkone de Bela, Arnoldo de Petirswalde, Nicolao de Ranchow et Johanne nostro notario, testibus ad donacionem dotalicii domine preexpresse, que dominos Heynmannum de Rychinbach et Renczkonem Schaff in provisores et veros tutores sibi eligebat. Harum testimonio literarum sigillo regio capitaneatus Frankinsteynensis ad hereditates et causas munitarum. Datum Frankinsteyn feria secunda infra octavas sancti Johannis baptiste anno domini millesimo trecentesimo quinquagesimo secundo.

Or. Perg. An grünseidner Schnur das S. der königlichen Hauptmannschaft (innerhalb des Siegelkreises der nach rechts schreitende böhmische Löwe; Umschrift: † SIGILLVM . CAPITANEATVS . FRANKENSTEYNENSIS / AD . HEREDITATES . ET . CAVSAS., in zwei um das Siegelbild laufenden Kreislinien. Vgl. Saurma's Städtewappenbuch S. 51. 52.)

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.